✿--- شجرة اللوز ---✿

من كمّن يوم حلمت شجرة اللوز
نحن نسمّيه بيذام .. وهو نوع من أنواع اللوز الهندي
شيء منه برّي .. و شيء منه بحري
البرّي يجننننننننننننننننننن طعمه

حتى البحري ،، بس أحبّ البرّي أكثر
خاصة يوم تكون الحبّة توّها بادية تستوي حمرا .. يعني جيه لونها بين الأخضر والأحمر
ف الحلم جيه كاااااااااااااااان .. يا ليته صدق
لأنه صدق ف خاطري .. أحين كم سنة مآ كلت منه ؟
اللي ف بيتنا حاليًا بحري ،، اممم الشيرة ما كانت ثامرة وايد
وكان من نصيب اليهّال !

: : : : :

شجرة اللوز يقترن ذكرها في عائلتنا بأحداث ومواقف معيّنة من الماضي
كان أحلى بيذام من الشيرة لي ف مزرعتنا ف عمان
ما شاء الله ، كانت كبييييييييييييييييرة ، والبيذام والله لذييييييذ

هو موسمه ف الصيف .. وكانو عيال الحاضره* اييون المزرعة
ويشلّون منها ويبيعونه ف الدكّان هههه
حليلهم .. أحيد كم مرة كننا نراقبهم وعقب نلحقهم ونتضارب وياهم
>> و محّد يصدق إني كنت رأس من رؤوس الشر <<

*عيال الحاضره: عيال البدو .. بدو جزيرة مصيرة
كانوا اييون ف الصيف ويترزّقون ،، وفي منهم اييون كـ تغيير جو
حد منهم عندهم بيوت ،، وحد منهم يسكنون العرشان
اللي يسكنون العرشان مسمّينهم بدو الحاضره .. يمكن لأنهم يحضرون فترة الصيف ؟
المهم ،،
ثاني أحلى بيذام كان من الشيرة اللي ف بيت عمي سلطان
وعقبهم ، اللي ف بيت عمي العود الله يرحمه
هالثنتين هن مسببات الأحداث الخطيرة هع
وكانت ضحاياها : أختي ،، سعيد ،، و أنا

~ أختي و البيذام ~
أنا ماحيد لأني كنت وايد صغيرة ،، بس لي أعرفه إنها طاحت من شيرة البيذام
اللي ف بيت عمي سلطان ع سور الزراعة ،،
وكان السور فيه حديدة و عورتها ف ريلها .. كانت حالتها خطيرة

~ سعيد والبيذام ~
كننا أنا وسعيد راكبين ع يدار المزرعة وهو يبا اييبلي البيذام اللي أحبه أخضر محمرّ
وكان هناك شيء نفتة دبيان ((خلية نحل))
هو حليله عشان خاطري ركب الشيرة ،، وكم مرة قلتله برايه يوم انه شيء نفتة
لأنه ع أي حركة >> عادي يلدغنه
المهم ، قاللي لا بييبه ،، و يوم يا يبا ينزل ، الدبيان طارن صوبه
حليـــــــله والله فديته ، لدّغنّه الدبيان وكان متمسك ع غصن كبير عشان ينزل

ضحّكني ، تم يقول ساعدوني ساعدوني ،، وانا فوق اليدار أصرخ سعيد انزل انزل
هو كان يتراواله انه بعيد عن الأرض ، بس هو كان قريب
من صريخنا حرمة عمي سمعتنا ويت تربع من المطبخ هههه و ف ايدها ليمون
وتحايل سعيد ينزل ، وهو مصرّ ويقول ساعدوني ساعدوني هههه
المهم حرمة عمي بعد تلدّغت
وانا ما زلت فوق اليدار ،، عاد عقب ساعدتهم وفركتهم بالليمون
آح وايد يحرق الصراحة ،، الله كان ف عونهم !

~ أنا والبيذام ~
سالفتي ف الصورة المتحركة خخخ .. كننا صغار (9 - 8 سنوات)
كان ف أحد أيام الصيف والجو مغيّم ،، وكانت شيء عزيمة ف بيت عمي العود
وكلنا هناك .. كانن قوم إمايه وحريم عمومتي ف الحوش قاعدات
المهم .. أنا وأختي اللي أصغر عني ركبنا فوق خزان الماي ،، بس عشان البيذام
هالمرة كنت بييبلها البيذام اللي تباه
كان بعيد عننا ،، عاد الذكاء اللي فيني شو ؟

تقبّضت ف طرف الغصن الصغير ،، وريولي ع حافّة الخزان
وكل شوي اتقرّب أكثر بسسس عشان أوصلله
وووو
طحت ع ويهي

كما هو موضّح ف الصورة أدناه .. أهم شيء الابتسامة شاقّه الويه طول الوقت هههه

عقبها أنا ماحيد شو صار ؟
بس أحيدني ماكنت أروم أتنفس لأني طحت ع قفصي الصدري
وانجلبت ،، وسمعت حشرة بس مب مفهوم الكلام
وعقب ؟ مادري ؟
بعدين الحمدلله يوم اني فتحت عيوني ،، شفت إمايه ويدّتي
وحريم عمومتي ع راسي ،، جنّهم كانوا يتحرونّي متّ ؟
لأنه نظرة الخوف ف عيونهم ههههه

أووه ! ياما طحت ع صدري ،، وأتمّ مآروم أتنفس .. هذا من غير سالفة الدوا !
الحمـــــــــــــــدلله ،، ع قولتهم قطوة بسبع أرواح هههه
لين أحين المواقف الخطيرة لي أعرفها 3 .. يعني باقيلي 4 أرواح ؟
أستغفرالله .. الله الحافظ ،، الحمدلله

                       اممم عاد الحلم ذكّرني بالذي مضى ،، وو كتبت !                        

✿--- السفر، ودّي به وأبيه وأباه وأبغاه ---✿

    

ربّي يشفيك ويعافيك يا أغلى أخو فالكون ، ربي يعودكم لنا بالسلامة
وإن شاء الله تكون آخر عملية
× الله يشفي جميع مرضانا و مرضى المسلمين والمسلمات ×

مادري كيف بتخطف الإجازة وجيه أحس بفتقد وجودكم واايد
لو سافرت عندكم ؟ هههه امبوني زاهبة ماشاءالله عليْ

إمّايه طِفرت مني من كثر ما أنوح السفر هههه
كل ما أقولهم ،، يقولون يوم بتعرّسين !

وانا بتريا ليــــــــــــــــــن هاك اليوم ؟
و اذاااا اذاااااا اذااااااااا مثلًا صار .. شو يضمنلي إني بسافر عقب ؟ هههه
عاد امايه عشان تفتك قالتلي خلاص بنشرط ع المعرس !
ودعتلي بـ ريْل يسفّرني ومايخلي بقعة ف الكون ،
لين أصيح وأنوح وأقول توبة ، خلاص مابا أسافر

لاْ لاْ لاْ
ليش امايه ليــش ؟!

كل شيء خلّوه يتحتم ع هاك الشخص ،، مب زين هههه العمر يمضي
والمفروض نستغل الفرص ، ومانقيّدها بوجود شخص أو غيره !!
حليله هالشخص .. كل الأحلام علّقوها عليه ،، وهو ولا يدري خخخ
اممم
أنا أدري إني طفّرتبها وكلت فوادها بسبة طاري السفر .. بس والله صدقي

*تنهيدة خفيفة*
لو بن بطوطة يقربلي ؟ كنت بندسّ ف حقيبة أغراضة .. وبسافر عنده

بجوب العالم .. وبشوف الدنيا
الدنيا نظر عين
يعني أستغفرالله صح إنها دنيا زائلة .. بس أحس حرام إني ما أشوف كل شيء فيها

آآآآ ،، أباااااا .. أبااااا أساااااافررر

أبوي مابيقول شيء .. أصلاً كل مرة أبا اقوله (وأكون توّني ف أول كلمة من الجملة)
يقوللي: سيري الله يحفظج ، محد ميوّدنج >>> نقمة طبعًا هههه
يعني كل شيء موجود إللا المحرم
وإخواني كل حد لاهي بإلتزاماته .. الله كريم

×××

مؤخرًا : إمايه قالتلي نقّي المكان لي تبينه وبتسافرين عقب التخرج
إن شاء الله ، وأتمنننننى إننا كلنا نسافر رباعة
يعني كل مرة حد يسافر و حد لا .. هالمرة نبا كلنا ~ بيكون حلووو
وأتمنى نسير العمرة ف هالإجازة .. يآآآرب

×××

تَغَرَّبْ عَنِ الأَوْطَانِ فِيْ طَلَبِ العُلَى .. وسافِرْ ففي الأَسْفَارِ خَمْسُ فَوَائِـدِ
تَفَرُّجُ هَـمٍّ، واكتِسَـابُ مَعِيْشَـةٍ .. وَعِلْمٌ ، وآدابٌ، وصُحْبَـةُ مَاجِـدِ

الإمام الشافعي

أعرف حقّ المعرفة .. بأنه لآ يمكن لأي شخص أن يستشعر مآتمرّ به

لآ أحد أبدًا .. حتى وإن مرّ بنفس الموقف أو التجربة

فهو لآ يملك ماتملك من مشاعر ولا يفكّر كما تفكر

مع ذلك نلجأ لأحدهم للمعونة .. نعم، فلا ضير من الاستشارة

لكن لآبد من تحكيم العقل في اتخاذ القرار

فكل شخص سيبدي وجهة نظره من منظوره

الذي قد يكون محدود أو ضيق!

.. .. ..

*لا يُلدغ المؤمن من جحرٍ مرتين*

كم انلدغت ؟ لأني في كل مرة أعتقد بأن الأمور تغيرت وأصبحت أفضل

لأني تفاءلت بأكثر من المتوقع أو الواقع

لأني دائمًا أحاول أن أحسن الظن

المؤسف أو قد يكون المفرح؟ .. في بعض المواقف .. وتحت عدة ظروف ..

أحاتي اشياء كثيرة معقدة

اعتبارًا بأن من حولي نفسي ويشبهني ..!

قد أكون عنصرية بذلك المعتقد ، ولكن هكذا أنا

وهكذا أتجاوز ما أواجه

بينما حين أقوم بما يتعاكس مع معتقداتي ؛ فإني أودي بنفسي إلى التهلكة !

كم أتمنى أن تكون الحياة شفافة

بمعنى الوضوح ، والتفاهم السلس بين الشخوص والأفكار وكل شيء حولنا

كم أكره المبررات والتبرير ... لا أحبذها

وأحبذ وضع مبررات مسبقًا للأشخاص (تحت إطار حسن الظن)

ولكن أتساءل؟ هل من أحد سيقوم بالمثل لي ؟

لايهم .. لم أعد أهتم .. ولن أهتم

شو بناخذ من هالدنيا ؟



✿---just to update---✿

خارج النص
من بين زحام الأحداث ، والأفكار , والمشآعر
~ أكتب هذه التدوينة ، وهي بمثابة .... اممم
بمثابة ذكريات مبعثرة على الخط الزمني القريب

النية الأزليّة : أكتب عن ذكريات ومواقف من الماضي البعيد
وأحين يبدو إنه النوايا تغيرت ... أو مادري ؟

أطنان الأشياء تبحر في مخي ، منها ما يكاد يغرق
ومنها مازآل يجاهد للوصول إلى ميناء الأمل

هيــــه يَ الأمل .. كم أحتآجك لتحقيق أحلامي ؟
و لتخطّي عقبات طريقي .. أنا أدري وعلى يقين تام
بأني يومًا ما سأصل .. وكّلت أموري لربّي نعم المولى و هو على كل شيء قدير

تعرفون ؟

من كثر مآ أمنّي عمري وأقصّ ع عمري .. أحسّ بهشاشة في جوفي
يعني يمكن يوم بموت ~ بسرعة بتحلل ههههه وبتحوّل نفط قبلكم

داخل النص و على النطاق الأكاديمي

بآقي أسبوعين من هالفصل .. وبتبدأ إجازتنا
أشك إنهآ بتكون إجازة حقيقية ، بس المهم نتنفس تنفس طبيعي شوي خخخ
وعقب الإجازة شووو ؟!

بيبقالي فصليـــن وبسسسس وبتخرررررج من مصدر
إذا الله أحيانا إن شاءالله .. صح إني بتريا فصل لين التخرج الرسمي .. بس يعني الحممممدلله

فديتهآ امآيه من أحين مزهّبتلي كندورة حق حفل التخرج
يآآآرب ايي هاليوم بأسررررررع مآآآآيمكن

... ... ...

ومن أسبوعين مآرديت العين .. آآآآه كم اشتقتلهآآآآآآآ ؟!

وووو أحلى شيء يوم كل حد مشتآقلك هع
بس شسمه .. اممم أنا أعاني من شيء هههه

يعني ع كثر ما إحساسي مرههههف ومشاعري جياشة
إلا إنّه عملية الترجمة عندي فيها خلل

... ... ...

الأسبوعين اللي خطفن ، كان أوّلهن من أجمل أسابيع مصدر
وكآن ثانينهن من أقسى الأسابيع *نوعًا ما* 

الأول كان أسبوع التجهيزات للإحتفال باليوم الوطني الـ42
ردّني لأيام الجامعة .. أيام تنظيم الفعاليات والمؤتمرات

حلووو جيه يوم نطلع من أجواء الدراسة حينًا من الوقت

ذكريات هالأسبوع مابنسآهآ وبتمّ في بالي دوووم .. أحب أتذكرها

اممم تبون الصدق الحقيقي ؟

من أول مآدخلت مصدر وأنا خااااطري أشارك ف شيء
امممم بس بيئة مصدر تختلف عن بيئة الجامعة من عدة جوانب

ومآتوقعت إني أشارك ... لكن شاركت
هيـــه شاركت وكان حلوو الحمممدلله بغض النظر عن بعض الأشياء

... ... ...

ع أيام الجامعة .. أول مرة تأخرنا فيها ف الجامعة كانت عشان تنظيم
IT Marathon – 2011 ... http://cita-uaeu.blogspot.ae/

امممم يعني يوم كنت رئيسة القروب .. حمّسنا بعض إنه نتأخر
وتمينا لين 12 وشيء .. كان الأمر غريب ، وعلى غير العادة

بس الحمدلله مآانهزبت هاك اليوم خخخووو في مصدر .. لين متى تمّينآ ؟

حطمت الرقم هههه تمّينا لين الفير .. بالأصح بعضنا واصل لين خلص الحفل
كنتُ أخشى أن أترنح ع آخر شيء

لأني قريت معلومة ، عاد الله أعلم بمدى صحّتها:

"عدم النوم لمدة ٢٤ ساعة متواصلة يؤدي إلى إبطاء الاستجابة بما يساوي تأثير شرب ٤ كؤوس من الخمر"

الحممممدلله كان يوم طويل حافل بشتّى أنواع السعادة

اممم مآعندي انستقرام .. بس ترومون تشوفون لقطات من الحفل بهالهاشتاق:
#masdar_institute …. #masdar_photography_competition

here are some, taken by Rashed Ali *Thanks for sharing*

 

وخاطري أكتب تفاصيل الأيام .. بس بيكون البوست ضخم هههه
سأحتفظ بتلك التفاصيل لنفسي

 

شكرآآآآآآ وآآآآآآيد لكل حددد بذل مجهود لإنجاح الحفل
والسموحة منكم ع أي تقصير

هيــه صحح قولوا إن شاء الله صورة ثيابي تفوز هع

 

رزقني الله وإياكم سعادة الدنيآ والآخرة .. قولوآ آمييييين
×× هالبوست مب هو البوست اللي كنت بحطه ،، بس يعني كـ تجديد ××

تحت النص هههه

سوالف اليهّال مآأتخلص  من أول مآوصلت وهم متيمّعين حولي
يسولفون .. ويتناقرون
جنّه ديايه وصقيواتها !!!! هههه مب ملحّقه لا ع سوالفهم ولا ع الريبورت
وحاليًا حاليًا مسويللي فقرة عروض ف الحجرة
أختي تقوللي ساحرتهم هههه وإمايه تقول القطو يحب خنّاقه
يعني ع كثر مآأطفّربهم خخخ