✿---نقطة نهاية---✿

أحيانًا ،، أو في كثير من الأحيان

نحتاج لـنقطة؛ لتُنهي تلك الجُمل .. بغضّ النظر عن مدى إيجابية تلك النهايات

فنحن فقط في حاجة للنهاية ،، النهاية فقط

قد شارف عامي الـ25 على الانتهاء

اممم ،، هاي أحد النهايات اللي مابا أعيشها خخخ

لكن لابد منها ! + أنا في حاجة لذلك

قد تُنهي معها الكثير ،، فتحملُه معها وبعيدًا تسير

سنة الـ25 ،، تختلف عن سابقاتها جدًا

كانت كريمة حد السخاء ،،، بدأت في لوس أنجلوس

في السفر ؛ حيثُ يُسفر عن وجوه الآخرين ، و الفوائد السبع !

جادت بالكثير من المواقف والبشر

ولم أدرِ أني أمتلك ذاك القدر من القوة والصبر

و أشياء أخرى يجب أن تتغير !

ع فكرة أنا وايد يوعانه ،، ومن شدة اليوع؛ أحسه في بطني يحفر

. . . وو بقيّة الحديث في يونيو \ الثامن عشر

شو رايكم ؟ أعرف أكتب وأعبّر !؟

✿---قصة حلم---✿

"غفيت ع وضعيتي المعتادة ، وظهرتيلي ف الحلم ... ولين الحين قاهرتني"

هكذا قالت عبير !
حليلي ليش ؟ شو السالفة ؟ خخخ

نصّ القصّة:

كانت طالبه من المطعم ،، وو في غفوتها حلمت إنني طلعت وسبقتها
عشان آآخذ الطلبية ،، كانت تلحقني و تزقرني ،، وأنا مسوتلها طاف !
ركضت عبير أسرع ما عندها ، ويوم قدها قريب \ أنا ركبت البعير و سبقتهاا
وكنت أغايضها: مابترومين تلحقيني خخخ !
انقهرت عبير ،، و ف خاطرها : لو يبت السيكل !!
وو انتهت غفوتها ،، وخبرتنا تلك الأحداث ف قروب الواتساب !
المهم ،،
عاد عبير تبا ترد تكمل الحلم عشان تسبقني ،، وتخلّي عايشة ضمن شخصيات الحلم
سإلت عايشة شو تبين تركبين ؟
وأنا اقترحتلها "سلحفاة" خخخ
بس هي تبا حصان أبيض !
 
اليوم العصر نشّيت ،، وشفتها مطرّشة هالرسمة
"رسمة عبير"

كـ توثيق لأحداث و حوار يوم الخميس
المهم إني شو ؟ ~ ع ظهر البعير و ساببقتنهن و أفكر ف السفر ! هههه

✿---current feelings---✿

~ encrypted ~

✿---جمعة المطر---✿

بداية الحلم ،، كانت ح ل و ة
بس بعدين ؟
لا
اممم ،، اللهم اجعله خير و سرور
****

جمعة المطر ،، مذكرات يوم من أيام الإجازة الوهميّة
>>يوم بوصل العين بالسلامة بكتب البوست<<
إن شاء الله
"خلاص كتبته هنيه تحت ، الحمدلله"
****
---update---
جمعة المطر، من أحلى أيام الإجازة السريعة

في بداية اليوم ،، كنت راقدة ف الصالة
ونشيت ع الساعة 3 وشيء الفير
وسمعت صوت الرعد ،، سرت حجرتنا وشيكت من الدريشة
حلووو كان مااشاااءالله ،، كان بسسس رعد وبرق
والجو حار ،، اممم أو جنّه ضاغط
المهم ،، رديت أرقد
والفير الحقيقي ،، يت أختي توعيني وتقوللي شيء مطررر
الصراحة مانزلت ،، بس تميت أطالع من الدريشة
وعقب رديت ،، كنت تعبانه وأبا أريّح خخخ
عقب يوم خواتي ينْ يخبّرني إنه سعيد بيودينا بالسيارة نتمشى ؟
أنا نشششيت وراح التعب ،، وكل نشاط الدنيا فيني ههه

طلعنا 6 الصبح ،، وردينا البيت 10 وشيء

وهذا ريوقنا ،، ولو إني مااأشرب لا الشاهي ولا الكرك
بس عشان سعيد ،، شربت

أحلى شيء يوم نرقى العراقيب وو نعفّد وو جييه

وو حشرتهم برجل الرمل اللي أبا أسويه
بس سعيد ماطاع !

المهم كملنا حواطه ولعب ،، ومن كثر ماتنعاد القصيدة لي حاطينها
لاعت كبدي ،،، وو يمكن من الكرك ؟
حسيت إني ماروم ،، بس حاولت أتناسى عشان نستمتع

طبعًا يوم سعيد يعفّد ،، أنا لا إرادي أشهق وأصارخ
وسعيد ميّت ضحك علينا ،،

عاد ف آخر مرة ،، أنا حسيت إني بطيييح بالصدق
وأقوللهم الله حلووو بطيييح لااا بطيييح
وووو . . . غرزنا !

يوم بطلت الباب هههه زين إني تقبضت وللا كنت بتدربح
ووو لين يا سالم وو طلعوا السيارة ،، سوينا رجل الرمل عن خاطري
خخخ

،، العصر: قررنا نسير المزرعة ،،
وهذا أحدث المواليد

عقب كمّن يوم سرنا ،، ولقينا مولود أصغر عن الأبيضاني ،، ماشاءالله حلويين

وو جيه يعني ،، الحمدلله
هالأشياء رغم بساطتها ،، إلا أنها تسعدني جدًا


---end---
****
مادري ليش ييت بوظبي ؟ هههه ع أساس أكمل البروجكت و أدرس للإمتحان
بس ماباا ،، خلاص برد العين
قلتلهم يطرشولي الدريول ،، هم في الدرب أحين ههه
اتذكرت أيام الإبتدائي ،،، يوم كنت أشرد من المدرسة !
(هنا) مزيد من التفاصيل خخخ

✿---فضفضة سريعة مؤقتة---✿

removed ~

✿---عمان \ الشرقيّة---✿

كانت رحلة سريعة ، لمدة ليلتان
المغزى منها صلة رحم
عناصرها : سالم أخوي ، و خواتي الثلاث وأنا *وأعوذ بالله من كلمة أنا*
من متتتتتى ونحن نرتب حق هالشّومه ، وما فِسْرَت إللا مع بداية 2014
وكل حد هناك يتريانا ، ويرتّب حق عزايم و رحلات و و و . . .
وياليتنا تمّينا أكثر ، عشان نستمتع أكثر هع
بس الوقت ضيّق جدًا !
الحمدلله عَ الأقل سرنا وسلّمنا عليهم وو استانسنا

ووكما وعدت سابقًا ، سأشارككم بعض الصور مع بعض الذكريات خخخ
لازم أرمس وأكتب وايد هههه

المهم ،، هالمنطقة بالتحديد اسمها سناو
*منطقة عريقة وُجد فيها آثار تعود لسنوات 4500 قبل الميلاد*
و منذ مئات السنين  ،، كانت المنطقة لإحدى القبائل
ونظرًا لخصوبتها و وفرة خيراتها ، تحاربت عدّة قبائل لامتلاكها وتملّكها
قبيلتنا كانت إحداها !
يعني أساس القبيلة هو منطقة السّليف\عبري ،
إللا إنه بعض فخائذ القبيلة ارتحلوا إلى سناو
من السّليف لين سناو في وقتنا الحالي تقريبًا 3 ساعات
يعني ف هاك الزّمن و عَ البوش ؛ كم يوم لين وصلوْا ؟!
ولهالدرجة سناو خصبة وتستاهل الترحال والحرب ؟!

قبيلتنا فازت بجزء منها ، وشاركتها قبيلة الرواشد
*الراوشد لِي هناك غير عن الرواشد لِي هنيه*
حاليًا كثير من القبائل تقطن هناك
المهم .. الآثار السكنيّة موجودة إلى الآن ،، وهي قيْد الترميم
بيوت طين .. وكل أفراد القبيلة يعيشون في نفس المساحة
كانوا يسمّونها حجرة .. بس هي طبعًا كبيــــرة ،، جنّها مدينة
كل شخص وبيته الخاص ، حتى كانت طوابق ، مب بس طابق واحد !
وفيها أسواق وكل شيءومسوّرة بسور ،، وفيها بوابة كبيــرة
يعني نفس مانقول أحين مجمع سكني

وهاي مزرعتنا .. كانوْا يسمّونها الغرقانة
لأنه ما شاء الله (في الزمن القديم) كان فيها ماي وايد

فليل مارمت أرقد لين أشوف سماهم ونجومها !

اللّـــــه ، والله ما شاء الله وااااااااايد حلووووة السماء
مرصّعة بمختلف الأحجام من النجوم

 ****
في ثاني يوم ،، كانت إحدى خالاتي مرتّبتلنا رحلة في أحد السّيوح
اممم إمّايه حَد من ’هَلها بدو ، وحَد حضر .. مخلّطة يعني
*فوق ماتتوقعون هع*
وتقريبًا أغلبهم في جوار منطقة سناو .. والبعض في مناطق بعيدة
عاد نحن سرنا حق الأقارب القريبين ، قلبيًا وفعليًا هع
والمنطقة اسمها العينين .. أنا وااااايد أحبهاا
أحب العين والعينين هههه

بس صدق ، ناسها حببّوني فيها ، وذكرياتنا هناك كثيرة وفيرة
*إن شاء الله بخبركم عقب عن مغامراتنا أيام الطفولة*
سرنا الصصصبح سلّمنا ع حرمة عمّ إمّايه
*ياويلنا لو درت إنّا صوّرناها !*

عقققب قالولنا انه خالتي والبنات يتريونّا قرب الوادي

المكان وايد حلو ما شاء الله
وأحلى شيء لمّتنا وسوالفنا

كانت وضحى تخبّرني سالفة ، وف السالفة وصفت مكان فيه حصاه عووودة وناااعمة
وعادةَ يلعبون فيها .. يتزحلقون ههههه
يوم خلصنا غدا ،، قلتلهم ودّونا أبا أشوووف كيف ؟
سرنا صوبها .. الصراحة ما كنت مستوعبة كيف يتزحلقون !
يوم وصلنا ؛ قلتلهم بجرب ،، 
وكل حد متحمّس واللي ميوّد تيلفونه\كيمرته يصوّر !

وخالتي خايفه عليْ ؛ لأنه تحتها شيء حصى صغييييير يزحلق 
وتحته ماي من بقايا المطر
يعني اذا طحت من الحصاه العووودة وانزلقت بالحصى الصغير ، 
بطيح ف الماي وصعب أظهرالماي مكانه وايد منخش خخخ

المهم ركبت فوق عند رقم 1 خخخ ،، وتزحلقت

حلووو كان ،، ويوم أشوف الفيديو والصور أنقع من الضحك

وبعدين خواتي يَن وبنات خالاتي وتمّينا نلعب ، بسمّيها حديقة البدو
وضحى دايمًا تحرّضني ،، تعرفني عادي أتهوّر !
قالتلي انه المكان لِي فوق (*) أنعم بوايد عن اللي كننا فيها ،، وشيء هناك آثار
قلتلها أبا أشوف انزين ،، قالتلي ماترومين تصعدين فوق صعب
عاد أنا لحّد يقوللي ماترومين

الصراحة والصدق ،، المكان خطير وضيّق ويزحلق
بس ليش تقوللي ماترومين !
المهم يوم بديت أصعد ،، كانن بنات خالاتي كلهن قاعدات يتريّني
يبن يشوفن ~ بقدر وللا لا ؟ جمهور ماشاءالله
عقب ما وصلت تقريبًا بعد معاناة ، أختي صعدت
أنا وصلت فوق ،، بس عشان أوصل المكان اللي فيه الآثار واللي يزحلق
لازم أنقز .. نشبت ف هالمكان ! مب رايمه أنزل ولا رايمه أكمل

اذا نقزت بنزلق ويمكن أطيح ف هالفتحة ،، و الله أعلم شو هناك ؟!
عاد شو سويت ؟ ههههههه والله كلهم تمّوا يضحكون ع الحركة
بس المهم وصلت ،، وتمّوا يصفقون ،، ههههه وأختي الثانية تصوّر فيديو

وخالتي وأختي العودة ف الصوب الثاني متغيّضات ومتروّعات علينا ف نفس الوقت
والله حلوووو كان ،، يوم تزحلقت خفت أتحمّس بزيادة وأطيح من فوق جيه مرّة وحدة
وأخشّ ف السِّمرة هههه آآيْ وأتشمّخ ؟!

يخوّف المكان بس والله مممممتع وحلوووو كان

هاليوم كنت لابسة بريسم *حرير* وكاشخة
وعقب هالشيء كلّه ~ اختربت الكندورة
بس عادي كل شيء يهوووون في سبيل المتعة

اممم المسا .. سرنا عزبة عمّي سلطان ،،وتعشّينا هناك .. أحلى شيء يوم كان يخبّرنا
سوالف الأوّليين

رغم إنه كننا تعبانين ،، بس اللّمة الحلوة ماتتعوّض
اممم للأسف ،، مارمت أصوّرسالم ولد عمّي قِفل تيلفوني ومارمت أفتحه
إللّا يوم ردّينا البيت

ووو هذا كان باختصار بسيط ،، كانت رحلة جدًا رائعة
الحمدلله ، وان شاء الله المرّة الياية نقعد فترة أطول
وأراويكم صور أكثر

{ ربّي يسعدنا في الدّنيا والآخرة ، ويجمعنا بمن نحبّ دائمًا }

✿--- Not anymore ---✿

I'm losing a lot of myself .. I don't want to lose more anymore

I don't want to
I don't want to
I don't want to
I don't want to
I don't want to
I don't want to

[here]