✿----يوم السفرة----✿

.. خارج النص ..
وااايد أحب الناس اللي يوم تبتسم وتفرح تبيّن فرحتهم ف عيونهم
وتلمع جيه نفس الرسوم خخ .. ع قولة غياهيب:
تبتسم عينه قبل بسمة شفاته

~
وو بندخل النص:
قرّب يوم السفرة ،، وكل حد يقوللي لا تسيرين ، بنشتاقلج
محد بيتم ف البيت !
وبنات أخوي ،، مايبنّي أسير .. وو يا إنني أتم عندهن أو إنني أشلهن وياي
والله خاطري أسافر وياهم كلهم ،، بس اممم الله كريم !

المهم .. جهّزت حقائبي ،، وأعترف إنّي من النوع اللي يشحّن كلللل شيء
تحسبًا يعني هههه ،، دايمًا أقول ف خاطري ؛ انزين يمكن أحتايْ ..؟
بس هالمرة حاولت أقلل من احتياجاتي

العصر هبّت ريح قوووووييييية .. أنا مااحب الريح بس أحب صوت الرعد
ويوم سمعته فرررحت ،، وكنت أتمنى إنه يصب مطررر
الحممممدلله ،، كان مطررر قووووي \ ي الله ،، من زمااااان عنه !
أحس إني تشققت من الفرحة هههه
وكلهم يعلقون ؛ هذا المطر يودّعج لأنج بتسافرين
وعمي قاللي: شفتي ؟ أثرج طيّب .. وعسى تسيرون وتردون بالسلامة وببياض الويه
~ فديته مغْلااه ~
.. دعواتكم له بالشفاء العاجل ..
 

وااايد أحب المطررر ،، وأحب أتسبح فيه
تمينا طول الوقت ف الحوش ،، واايد حلوو كااان .. يجنن مااشاااءالله


و يوم خف المطر ،، فرشوا الحصير ف الحوش ،، وآخر مشهد شفته:
هلي كلهم متيمّعين وقاعدين ،، ولون الجو يجنن ؛ جيه صافي وو بألوان حقيقية
سلمنا عليهم ،، وسرنا المطار .. سعيد و أحمد و أنا
وو هناك ع أساس نلاقي اخواني وو خواتي اللي ف بوظبي ،، ويسلمون علينا
حلوو كااان ،، حسيت إني أباهم يتمّون لين نطير 

بس كان لازم يسيرون يصلون المغرب ،، وأنا كنت ميّتة يوع
مافطرت غير بماي !
بس الحمدلله عقب ،، فطرت عدل ،، سعيد مااقصّر
ويوم تيمّعنا كلنا ،، تصوّرنا كم صورة جماعية
وو عقبها غادرنا .. وطرناا

عادةً ،، مااأحب أرقد يوم نسافر .. وو ما أحب أطالع أفلام !
بس أحب أطالع من الدريشة ،، ويمكن أطالع الناس .. وأفكّر وو أكتب
هالمرة كان فليل .. ومايبين شيء
ومبيّتة النيّة إني أرقد طول الوقت


رقدت .. طبعًا رقاد متقطع .. ويوم نشيت كان وقت الريوق
أول ما نشيت حسيت بحرر شديد .. وأقول حق سعيد حرر وللا أنا بس حرانه ؟


عقب حسيت بدوخة ،، وإنه بيغمى عليْ
تميت أدعي ؛ ياا رب لاا دخيلك مب أحين .. وسعيد يحايلني عشان أتريق
وأنا مب رايمة آكل ،، ريحة الأكل زادت الأمر سوءًا
بس شربت ماي ،، وكلت قطعة تفاح وبرتقال
و سعيد يهفّ عليْ .. قلتله خلاص أنا أوك

آآه ! ماا أحب جيه ،، أحس بالضعف .. وو ما با أعبّل عليه
غمضت عيني وتميت أدعي إنه كل شيء يعدّي ع خير ونوصل بالسلامة
والحمدلله صرت مثل الحصان وأحسن ههه
ودوّنت بعض مايجول في خاطري في دفتر مذكراتي

الحمدلله وصلنا بالسلامة ، وظهرنا من المطار 5 وشيء العصر


ووصلنا الفندق 7 إللا ربع ،، اتفقنا نتلاقى عقب ساعة تقريبًا
عشان نسير الجمعية وو ناخذ عشا
وو خذنا عشانا من ماكدونالدز ،، وردينا الفندق
عقب العشا ،، رتبت أغراضنا .. وكتبت مذكراتي ،،
وادّهنت بفكس (لازم .. مااأستغني عنه ههه) ،، ورقدت

هاليوم تعرفنا ع بعض أكثر ، واكتشفنا روابط عجيبة بيننا ،، فعلًا الدنيا صغيرة

 

✿----الموافقة والقبول----✿

مسّاكم الله بالخير والنور والسروور

بما إني أنجزت وخلصت اللي لازم أخلصه ، بكافىء عمري وببدأ أكتب مذكرات اليابان
وعشان أحافظ ع هالمذكرات في مكان واضح ،، بحطها تحت تصنيف:
مذكرات اليابان

اليابان كانت لي حلم ، قبل أن تكون فرصة تحتّم عليْ اغتنامها
و حين يجتمع تحقيق الحلم باغتنام الفرص ؛
يصبح لساني عاجزًا عن التعبير عن مدى سعادتي حينها
بالصدق الصادق الحقيقي : الحمدلله وااايد ع كل شيء

معهد مصدر فتحلنا المجال لفرص عديدة خلال فترة الصيف ، وأنا عن خاطري و كما اعتدت
باشرت في اغتنامها ،، وكنت وايد متحمّسة لبرنامج آيسلاند
بس يوم وصلني ايميل من رئيسة ومسؤولة برنامج قادة المستقبل (زينب) ،،
الحماس كسر التيم
لأنه السالفة فيها اليابان !

عقب ما طرشت المقال ،، (( المقال كان معيار الاختيار ))
قلت حق امايه ،، تراني قدمت ع شيء ،، وادعيلي إنهم يختاروني
قالتلي ع شو قدمتي ؟ أكيد سفر ، صح ؟
ضحكت وقلتلها اممم هو برنامج مدته 10 أيام ،
واذا شاركت فيه بيكون إضافة إيجابية في سيرتي الذاتية

، ، ،
خطف الوقت ،، ويوم وصلني إيميل إنني انقبلت ؛ اختبصت مشاعري من الفرحة ههه
وطبعت ورقة الموافقة ،، ويوم ردينا العين
قلت حق امايه عندي علوم ،، قالتلي خير إن شاء الله
قلتلها تحيدين يوم أقولج ادعيلي ؟
قبلوووووني
وبسافر اليابان


هههه ،، عطتني هاييج النظرة ،،
قلتلها: حرام ماتوافقين وو هم مختاريننا من بدّ الطلاب كلهم ،،


قالت: انزين ومنو المحرم ؟ مابتسيرين بدون محرم
قلت: أكيد مابسير بدون محرم ،، سعيد وعايشة بيسيرون وياي
(( أنا طبعًا من قببببل ،، مرتبة ومخططة كل شيء ))
يعني عادي صح ؟ \ قالتلي: شوفي أبوج
سرت عند أبوي ،، وو والله يوم أتذكر شكلي والموقف
كان وايد عبيط ،، جنّي ياهل



المهم خبرته والورقة كانت ف ايدي ،، عشان على طول يوقع هههه
والحمدلله ،، تمت الموافقة بنجاح وتيسرت الأمور ،،

بس حرام أختي ماطاعوا يعطونها إجازة
وو ماسافرت ويانا (( معوّضة عوض خير ياا رب ))

••----------------------------------••

اممم ،، تعرفون ..؟!
كنت دايمًا أقولهم .. بسافر اليابان ،، و يوم بسافر اليابان بسوي وو بسوي .. إلخ
وقبل 6 شهور تقريبًا أو أقل .. كان شيء تقديم ع برنامج التدريب في اليابان لمدة شهرين تقريبًا
وربيعاتي كانن يقوللي قدّمي ،، انتي شطورة ؛ بيقبلونج بسرعة ،،
كلمي الدكتورة بتتفهم وضعج حتى لو قدّمتي متأخر
اممم
بس ما لحقت أقدّم ،، لأنه هاييج الفترة خالتي الله يرحمها غرقت ،،
وكانت ف المستشفى ،،
وو الأوضاع العائلية كانت غير مستقرة .. وو عقب توفت و كانت الأجواء ما تسمح

سبحانه ،، لعله خير !
محد كان يعلم أن هناك فرصة أخرى قد خبئها القدر لنا
#الحمدلله

✿---أيام معدودات-✿

رمضان خطف بسرعة ،، وايد بسرعة !

لنغتنم ما تبقّى منه ، هي فقط 10 أيام .. أيام معدودات

أسأل الله لي ولكم ولجميع المسلمين والمسلمات ؛ رضاه و عفوه وستره وفسيح الجنان

ربنا بارك لنا فيما تبقّى ، واجعلنا من عتقاءك

ربنا انصر الإسلام والمسلمين في شتّى بقاع الأرض

ربنا لا تؤاخذنا إن نسينا أو أخطأنا

ربنا لا تحمل علينا إصرًا كما حملته على الذين من قبلنا

ربنا ارحمنا وارحم جميع موتانا وموتى المسلمين والمسلمات وأسكننا فسيح الجنان

ربنا اشفنا وعافنا واعفُ عنا و جميع المسلمين والمسلمات

اللهم اهدنا الصراط المستقيم

اللهم إننا نعوذ بك من ضيق المقام يوم القيامة

اللهم إنك عفوٌ كريم تحبّ العفو فاعفُ عنّا

الحمدلله عدد ما خلق ، والحمدلله ملء ما خلق ،
والحمدلله عدد مافي السماوات وما في الأرض ،والحمدلله عدد ما أحصى كتابه ، والحمدلله ملء ما أحصى كتابه ،والحمدلله عدد كل شيء ، والحمدلله ملء كل شيء

✿---نقطة نهاية\2---✿

> يتبع . . . البوست اللي تحت <

حين كتبت عن نقطة النهاية ، كنت مستاءة جدًا
جدًا .. كثيرًا
كنتُ أعتقد أني قد أستطيع التعبير عن استيائي من كتابتي
ولكن ،، أعلم أني لا أجيد ذلك !
قد تضيق بنا الأرض بما رحُبت ،، و نرغب في التعبير عن ذلك
ولكنني لم أعتد أن أُعلن عن استيائي و حزني

. . . . . 

فكما قلت سابقًا و دائمًا ،، لا يليق بالمسلم أن يحزن
لأن لنا ربّ عفوٌ كريم ، بالمسلمين رؤوفٌ رحيم

 
عمومًا ،، قد تريح الروح بعض أنواع الفضفضة
وتغيّر من حالها ،، للأفضل

 

كنتُ أنتظر الكثير من نقاط النهاية ،، لأنهي بها تلك الجُمل
لكن قبل نقطة النهاية ،، هناك فاصلة زمنيّة
قد تأتي بعدها جُمل تحمل تفاصيل ماقبلها
أو جُمل تجمّل ما قبلها من الجُمل !
يونيو \ الثامن عشر ،،، فاصلتي الزمنية
بدايته كانت مليئة بالمفاجآت
قد أشارككم تفاصيلها لاحقًا

شكرًا لكل ناسي وخلّاني ، وأهلي وأحبائي ومحبوبيني
على أمنياتكم الجميلة التي وصلتني بمختلف الطرق ،،
بدءًا برسائل اليد المكتوبة وإنتهاءً بأحدث وسائل التواصل الاجتماعي والمرئي
حتى البعوضة ،، شكرًا ع اللدغة ،، وفوق عيني بعد !

 * * * * * * * *

I LOVE U ALL .. ALL .. ALL ~ you made my day

وفقني الله وإيّاكم ،، وسدد خطانا و خطاكم

✿---نقطة نهاية---✿

أحيانًا ،، أو في كثير من الأحيان

نحتاج لـنقطة؛ لتُنهي تلك الجُمل .. بغضّ النظر عن مدى إيجابية تلك النهايات

فنحن فقط في حاجة للنهاية ،، النهاية فقط

قد شارف عامي الـ25 على الانتهاء

اممم ،، هاي أحد النهايات اللي مابا أعيشها خخخ

لكن لابد منها ! + أنا في حاجة لذلك

قد تُنهي معها الكثير ،، فتحملُه معها وبعيدًا تسير

سنة الـ25 ،، تختلف عن سابقاتها جدًا

كانت كريمة حد السخاء ،،، بدأت في لوس أنجلوس

في السفر ؛ حيثُ يُسفر عن وجوه الآخرين ، و الفوائد السبع !

جادت بالكثير من المواقف والبشر

ولم أدرِ أني أمتلك ذاك القدر من القوة والصبر

و أشياء أخرى يجب أن تتغير !

ع فكرة أنا وايد يوعانه ،، ومن شدة اليوع؛ أحسه في بطني يحفر

. . . وو بقيّة الحديث في يونيو \ الثامن عشر

شو رايكم ؟ أعرف أكتب وأعبّر !؟

✿---قصة حلم---✿

"غفيت ع وضعيتي المعتادة ، وظهرتيلي ف الحلم ... ولين الحين قاهرتني"

هكذا قالت عبير !
حليلي ليش ؟ شو السالفة ؟ خخخ

نصّ القصّة:

كانت طالبه من المطعم ،، وو في غفوتها حلمت إنني طلعت وسبقتها
عشان آآخذ الطلبية ،، كانت تلحقني و تزقرني ،، وأنا مسوتلها طاف !
ركضت عبير أسرع ما عندها ، ويوم قدها قريب \ أنا ركبت البعير و سبقتهاا
وكنت أغايضها: مابترومين تلحقيني خخخ !
انقهرت عبير ،، و ف خاطرها : لو يبت السيكل !!
وو انتهت غفوتها ،، وخبرتنا تلك الأحداث ف قروب الواتساب !
المهم ،،
عاد عبير تبا ترد تكمل الحلم عشان تسبقني ،، وتخلّي عايشة ضمن شخصيات الحلم
سإلت عايشة شو تبين تركبين ؟
وأنا اقترحتلها "سلحفاة" خخخ
بس هي تبا حصان أبيض !
 
اليوم العصر نشّيت ،، وشفتها مطرّشة هالرسمة
"رسمة عبير"

كـ توثيق لأحداث و حوار يوم الخميس
المهم إني شو ؟ ~ ع ظهر البعير و ساببقتنهن و أفكر ف السفر ! هههه

✿---current feelings---✿

~ encrypted ~

✿---جمعة المطر---✿

بداية الحلم ،، كانت ح ل و ة
بس بعدين ؟
لا
اممم ،، اللهم اجعله خير و سرور
****

جمعة المطر ،، مذكرات يوم من أيام الإجازة الوهميّة
>>يوم بوصل العين بالسلامة بكتب البوست<<
إن شاء الله
"خلاص كتبته هنيه تحت ، الحمدلله"
****
---update---
جمعة المطر، من أحلى أيام الإجازة السريعة

في بداية اليوم ،، كنت راقدة ف الصالة
ونشيت ع الساعة 3 وشيء الفير
وسمعت صوت الرعد ،، سرت حجرتنا وشيكت من الدريشة
حلووو كان مااشاااءالله ،، كان بسسس رعد وبرق
والجو حار ،، اممم أو جنّه ضاغط
المهم ،، رديت أرقد
والفير الحقيقي ،، يت أختي توعيني وتقوللي شيء مطررر
الصراحة مانزلت ،، بس تميت أطالع من الدريشة
وعقب رديت ،، كنت تعبانه وأبا أريّح خخخ
عقب يوم خواتي ينْ يخبّرني إنه سعيد بيودينا بالسيارة نتمشى ؟
أنا نشششيت وراح التعب ،، وكل نشاط الدنيا فيني ههه

طلعنا 6 الصبح ،، وردينا البيت 10 وشيء

وهذا ريوقنا ،، ولو إني مااأشرب لا الشاهي ولا الكرك
بس عشان سعيد ،، شربت

أحلى شيء يوم نرقى العراقيب وو نعفّد وو جييه

وو حشرتهم برجل الرمل اللي أبا أسويه
بس سعيد ماطاع !

المهم كملنا حواطه ولعب ،، ومن كثر ماتنعاد القصيدة لي حاطينها
لاعت كبدي ،،، وو يمكن من الكرك ؟
حسيت إني ماروم ،، بس حاولت أتناسى عشان نستمتع

طبعًا يوم سعيد يعفّد ،، أنا لا إرادي أشهق وأصارخ
وسعيد ميّت ضحك علينا ،،

عاد ف آخر مرة ،، أنا حسيت إني بطيييح بالصدق
وأقوللهم الله حلووو بطيييح لااا بطيييح
وووو . . . غرزنا !

يوم بطلت الباب هههه زين إني تقبضت وللا كنت بتدربح
ووو لين يا سالم وو طلعوا السيارة ،، سوينا رجل الرمل عن خاطري
خخخ

،، العصر: قررنا نسير المزرعة ،،
وهذا أحدث المواليد

عقب كمّن يوم سرنا ،، ولقينا مولود أصغر عن الأبيضاني ،، ماشاءالله حلويين

وو جيه يعني ،، الحمدلله
هالأشياء رغم بساطتها ،، إلا أنها تسعدني جدًا


---end---
****
مادري ليش ييت بوظبي ؟ هههه ع أساس أكمل البروجكت و أدرس للإمتحان
بس ماباا ،، خلاص برد العين
قلتلهم يطرشولي الدريول ،، هم في الدرب أحين ههه
اتذكرت أيام الإبتدائي ،،، يوم كنت أشرد من المدرسة !
(هنا) مزيد من التفاصيل خخخ